Mawitea'n Ramthar Veng a enkawl dawn

Star Cement MPL13-ah vawin tlai dar 3:00 hian Ramthar Vengin Dinthar FC an hmachhawn dawn a, MPL club thar Ramthar Veng enkawl tur chu Lalnunmawia (Mawitea) a ni.

Ramthar Veng hian match kua an khelh aṭangin point sarih chauh an hmu a, relegation zone-a an awm avangin coach HC Zarzoliana banin assistant coach Mawitea'n head coach hna a chelh dawn. Ramhlun South tlangval Mawitea hi L. Jonathan-a'n a pui ang.

Mawitea hi MPL-a hming langsar ber zinga mi Malsawmfela nau a ni a, chutihrualin Sawmfela aiin MPL-ah hming a chher hmasa zawk. MPL hmasa berah khan Mawitea hi player langsar ber zinga mi a ni a, Dinthar champion-na kawngah khan goal ruk khungin hliam vangin match tawp berah an inlan lo.

Mizoramin Santosh Trophy an champion hmasa berah pawh winger pawimawh a ni a, khatih hun laia Mizoram team goal bawh natna chhan kha a ni pha. Dinthar winger pahnih Mawitea leh R. Laldanmawia te bakah Mizoram Police winger pahnih Lalbiakhlua (Biaktea) leh Lalfakzuala te te ṭhat lai hun a inrual avangin India ram pum huap pawhin Mizoram goal bawh a na hle.

Tunah erawh Mawitea'n ama pualin MPL team a enkawl dawn a, a club hlui Dinthar FC hneh ngei a tum dawn. Vawiin tlai hi inṭhian ṭhatna lantir hun a ni dawn lo a, Ramthar Veng tan relegation zone chhuahsanna hun ṭha a nih rualin Dinthar tan semifinal khel thei china dinhmun sawhngheh theihna remchang a ni.