International break-ah inhliam an tam!

Football club-ten international break an nghahhlelh loh chhan ber chu, an player-te hliam neia an kir ṭhin hi a ni - tun international break-ah pawh player inhliam an awm nual a, club tan chuan a ri a mawi lo khawp ang!

Liverpool forward Cody Gakpo-a'n season duhawm tak a hmang a, international break-ah pawh a khelh ṭhat chhunzawmin, Netherlands tan goal a khung. Mahse, Dutch forward hi 2-1 a Serbia an hnehna inkhelah, minute 17-naah lakchhuah a ngai.

Netherlands boss Xavi chuan, "A kerekah hliam a nei a, na tak a nih loh ka beisei," a ti a, he thuziak i chhiar meuh chuan a hliam dinhmun tak hi a chiang tawh mai thei.

Liverpool tana Gakpo khelhpui Alexander Isak pawhin Sweden tan goal khung mah se, hliam nei chungin Liverpool-ah a kir a, tun international break-ah ram tan a inlan tawh dawn lo.

Manchester United captain Bruno Fernandes pawhin Wales hmachhawn mah se, Norway a hmachhawn thei lo a, coach Jorge Jesus chuan, "United-ah hliam a nei sa tawh a, Wales lakah khelh a duh avangin kan khelhtir hram a ni," a ti a, Norway laka chhawr chhunzawm chi a ni lo.

Denmark-in 2-0 a Wales an hneh ṭumin Patrick Dorgu pawh lakchhuah a ngai a, United player hi he thu buatsaih a nih lai hian a dinhmun a la chiang lo.

Arsenal forward Kai Havertz leh Sunderland striker Brian Brobbey te Germany leh Netherlands inkhelh ṭumin an inhliam a, Real Madrid striker Kylian Mbappe pawh France tan goal khung mah se, kar hnih tal a chawlh a ngai dawn.

Bayern Munich chhuanvawr Jamal Musiala chu Netherlands nen an inkhelh dawnin, warm-up naah a inhliam a, Germany tan a inlan thei lo bawk.