Xavi-a'n Netherlands a chakpui

Barcelona legend Xavi-a'n match hnih a kaihhruaiah Netherlands a la tlawmpui lo - Pathianni zan khan an mikhualna ramah Serbia chu 2-1 in an hneh a, UEFA Nations League khelh mekah point li an hmu ta.

Dutch team tan Mexx Meerdink chuan goal hnih a khung a, Germany laka ram tana a match hmasa ber khel hian match hnih a khelh aṭangin goal hnih a khung tihna a ni - Netherlands tan chanchin lawmawm a tling.

AZ Alkmaar striker hian minute 30-naah penalty hmangin goal hmahruai a khung a, mahse, Serbia hian striker chhuanvawr Luka Jovic hmangin minute 46-naah an chhanglet.

Mahse, Netherlands tana a match hnihna kheltu Meerdink a phur laklawh a, minute 69-naah an goal hnihna a rawn khung - goal dang a lut tawh lo a, Netherlands-in 2-1 in hnehna an chang.

Netherlands-in Xavi hnuaiah hnehna an chang a, mahse, Dutch coach hian a la duhtawk lo. Barcelona boss hlui chuan, "Dik takin sawi ta ila, kha aia ṭha zawka khel tur kha kan ni.

"Chutihrual chuan lawmna tur a awm tho a, kan rilru puthmang khan min tilawm a, theihtawp kan chhuah bawk. Inkhel kan thunun a, kan khingpui aiin chance kan ngah zawk.

"Kan position-ah kan chiang a, kan talbuai lo - kha tak khan hmun awl a awm pawhin min chhawr ṭangkaitir ta ṭhin a ni," a ti a, hmasawnna a hmuh zel thu a sawi.

Netherlands hian tun intertnational break-ah match hnih khelh an la bak a, Greece chu October 1, Ningani zanah an lenchilh ang a, October 4, Pathianni zanah Serbia an mikhual leh bawk ang.