Pro Fight : Robert-a tan fiahna

Mizoram Labour Link LPS Pro Fight 2026 zan 18-na chu zaninah chhunzawm a ni leh dawn a, middleweight bakah bantamweight leh lightweight-ah round of 16 a nih tawh avangin boruak a sang tawh dawn.

Zanin inhnek turah 'main event' tia sawi tur a awm meuh lo a, mahse lightweight inhnek hnuhnung zawkah LV Robert Lalengliana a inlan leh dawn a, a vawi khat Pro Fight telnaah Robert-a hi quarterfinal lut thei dinhmunah a ding.

Kum 21 mi Robert-a hi a vawi khat Pro Fight telna ni mah se, state level-ah bronze medal a lo hnek chhuak tawh a, Origin Gym-ah a inzir bawk avangin tawnhriat nei sa ang maiin ring chhungah a tlangnel nghal.

Kumin inelnaah Robert-a hi vawi thum inhnek tawhin unanimous decision vekin a chak a, a inhnek hnuhnung berah vawi hnih lo chak tawh Manipur boxer Thangboi a hneh a, inrintawkna a ngah lai tak a ni.

Robert-a hi an inhnek chhung zawngin a chungnung zawkah a ṭang tluan zak ṭhin a, tharum a ngah bakah a fitness a ṭha tel bawk a, round thum an khel zawh thlengin a la ṭang khawng thei hle.

Churtihrualin zanina a hmachhawn tur New Vervek boxer Micky Lalbiakzuala hi seeden zingah a tel pha a, Tuipui Ferry tlangval Robert-a'n a hneh thei a nih chuan champion a sawi ri ngam tawh ang. Mahse a fimkhur erawh a ngai tawh dawn.

Bantam-ah Mualcheng South boxer Dolrich-a a inlan leh tawh dawn a, Pro Fight-a mikhual lo tak Dolrich-a hian Tuirial tlangval C. Lalruatfela a hmachhawn dawn. Ruatfela hi kuminah beiseiawm ber zinga mi a ni a, rinkai loh zawk ni mah se Dolrich-a hneh thei turin theihna sang tak a nei a.

Pro Fight hi a LPS Arena, Falkland-ah Rs 50 chawiin a en theih a, LPS YouTube Channel-ah member tan live-in a en theih bawk. Member nih man hi Rs 179 a ni.