Inkhel ngaihven hlawhah Ireland an chak

UEFA Nations League khelh meka inkhel ngaihven hlawhah Republic of Ireland chuan, Pathianni zan khan 3-0 in Israel an hneh a, kumin inelnaa an vawi khat chakna a ni.

Ireland tan Troy Parrott, Adam Idah leh Jack Moylan ten first half-ah goal khat ṭheuh an khung a, Israel-in chance nei ve mah se Liverpool keeper hlui, Caoimhin Kelleher an paltlang theih loh avangin a tlawm zawkah an ṭang.

Khelmual pawn lamah buaina an ngah avangin ram pahnihte football khawvelah ram lian ni lo mah se, kumin Nations League-a ngaihven hlawh niin an inkhelh laiin boruak pawh a sang hle.

A inṭan dan

Ram pahnihte hian an inelna ṭan a nih hma aṭangin chanchin an ngah a, Ireland coach Heimir Hallgrímsson-a'n squad a puan laia Israel an hmachhawn tur chungchanga a thil sawi vangin boruak a inmung chho ṭan.

Kum 59 mi Hallgrímsson chuan, "Israel nen kan inkhel dawn lo, kan hmachhawn dawn zawk. Hnam anga indo kan khelhpui dawn lo, kan hmachhawn dawn zawk," a ti a, hei hi Israel chuan an la na hle.

Israel FA chuan social media-ah chhanglet nghalin, "Khawvel leh mihringte tan hmun hrang hrangah ṭha takin hna kan lo thawk tawh a, Nobel Prize pawh kan lo dawng nual tawh. Keini pawhin âtna leh lemchang mize putute chu kan hmachhawn dawn zawk," an ti.

Ireland Football Association chuan Israel FA thuchhuah hi chhanglet tawh lo mah se, an match khelh tur hi boycott tura nawrna a awm nghal. September 21, Thawhṭanni khan Republic of Ireland team thlenna hotel pawnah nawrhna hi an lo kalpui tawh bawk.

Irish infiammi 160 aia tam chuan Israel nena inkhelh duh loh lantirin Ireland FA lehkha chhuahah hming an sign tawh a, an zingah Olympian Ciara Mageean, Republic of Ireland footballer hlui Louise Quinn, boxer Tyrone McKenna leh Eric Donovan te pawh an tel.

Engtin zel?

Ram pahnihte hian kumin Nations League-a an match hmasa ber khelin an chak lo ve ve a, Ireland -in si khat faiin Kosovo an ngam lo a, Israel-in 3-1 in Austria an hneh lo bawk.

Ram pahnih inkarah boruak ṭha lo a awm avangin, UEFA chuan an intum hunah home match pawh an ramah khelh a phalsak lo. Inrinni zana inkhel pawh hi Debrecen, Hungary-ah khelh niin Israel home a ni. Ireland pawhin an home match chu Backa Topola, Serbia-ah an khel ṭhin dawn.

Pathianni zan inkhelah pawh hian ṭan hma aṭangin sawi zui hlawh tur thil thleng a tam nghal a, Boys in Green (Ireland sawina) player te chuan 'armband' dum an hreng chhuak a, hei hi Palestine an thlawpna an lantirnaah ngaih a ni.

Israel hnam-in an hnam hla an sak laiin Irish player te chu hawi chhuak loin an kun tlar a, ṭhum vawrnaah pawh Ireland captain Dara O'Shea chuan Israel captain Manor Solomon a chibai duh lo.

Skyblue and whites (Israel sawina) ṭantu tlemte te chuan inkhelh chhung zawngin Ireland chu ṭawngkam mawi lo tak takin an au el reng bawk a, mahse a tawp thlengin buaina a chhuak lo.

October 4, Pathianni zana an inhmachhawn leh hunah pawh Ireland chu home team-ah an ṭang ve thung dawn a, mahse fimkhur thil thuah entu awm loin an khel dawn.