Kyrie Irving a inpeih tawh

Dallas Mavericks veteran player Kyrie Irving chu a hliam a dam hnuah, club-in chanchinbu mite an hmachhawnnaah season lo awm tur atan a inpeih tawh thu a sawi a, Mavs fan te tan thu lawmawm a ni.

Kum 34 mi Kyrie chuan, "Tunah chuan inkhel turin ka inpeih leh tawh a, ka team champion pui turin beiseina ka nei sang hle. NBA-ah kum 16-na ka hmang ve mek a, mahse kei aia inelna nuam ti an awm bik lo ang, chuvangin keimaha ṭha ber lan chhuahtir ka tum dawn a ni," a ti.

Irving hi nikum March khan Sacramento Kings nen an inkhelh ṭumin a khup a tina a, a hliam hi endik a nih hnuah ACL vei lam chu a thler avangin rei tak a chawlh a ngai a, a let leh hun tur pawh an sawi thei lo.

Mahse thla hmasa aṭang khan American point guard hi kuminah a lo let leh thei tawh dawn nia sawi a awm a, inkhel tura a inpeih tawh thu a sawi avangin Mavericks ṭantuten an beisei ai hmain Kyrie an hmu dawn.

Cleveland Cavaliers tan pawha khel tawh Kyrie hian 2023 khan Brooklyn Nets aṭangin Mavericks hi a zawm a, 2024 khan Luka Doncic nen inkawpin finals an hruai thleng. Mahse finals-ah a club hlui Boston Celtics chu 4-1 in an hneh lo thung.

Kyrie hian a career-ah vawi khat chiah championship title a la chawi a, a chawi hnuhnun ber hi 2016 daih tawh kha niin Golden State Warriors lakah an chakna three points a vawm lut nghe nghe.

Cavaliers a chhuahsan hnuah Celtics leh Nets tan beisei a pha lo a, Mavericks-ah erawh a khel ṭha thung. Season thara a lo kir hunah nomawi chawipui ngei a tum leh dawn.

June thla khan Mavericks hian an head coach atan Dusty May an la lut a, kum 49 mi May hian Jason Kidd a thlak. Coach thar hnuaiah Kyrie a khelh tawh dawn avangin bakah, damkawr a nih avangin a khelh dan a inthlak tawh mai thei.

Mavericks hi Macao-ah pre season-a an match chu October 9, Nilaini hian an khel dawn a, match hnih khel tur neiin an match hnuhnung zawk khelh hun tur an la tarlang lo. October 22, Thawhlehni zingah New Orleans Pelicans nen season thara an match hmasa ber khelin an inhmachhawn

ang

Hei bakah hian finals an luh ṭuma a kawppui Serbian point guard Doncic a awm tawh lo a, kum 19 mi Cooper Flagg nen an innghahna an nih a rinawm. Mahse Flagg hi 'rookie of the year' ni lai a nih avangin dah hniam a thiang lo thung.