McTominay-a'n inkhel a en ka beisei - Pocognoli

Scotland coach Sébastien Pocognoli chuan an midfielder Scott McTominay chu chhawr thei lo mah se, a awmna hmun aṭanga an inkhel a en a beisei thu a sawi a, a lo kir hunah an ram chu ṭha zawka a rawn khelhpui a beisei bawk.

Kum 39 mi Pocognoli chuan, "McTominay hian inkhel a lo en ka beisei a, kan khelh mek danah hian a rawn insiamrem nghal theih nan a lo inbuatsaih a, a rawn let leh vat ka duh a ni," a ti.

Manchester United midfielder hlui hi tun thla tir lam khan a lung phut dan a pangngai lo (mild benign arrhythmia) tih an hmuhchhuak a, a rang thei ang bera zai nghal niin hlawhtling taka zai a ni.

Scottish midfielder hi a lo kir leh hun chiang lo mah se, Napoli chuan kar hnih a chawlh hnuah training a zawm tur thu leh international break hnuah a inkhelh leh theih tur thu an lo sawi tawh.

Kum 29 mi McTominay hian tun season match hnih an khelh tawhah bul a la ṭan ve ve a, Nations League group stage a khel lo tur hi Scotland tan channa nasa tak a tling.

Pocognoli chuan sawi belhin, "McTominay hi chu khawi position-ah pawh a khel kual thei vek a, a khelhna hmun thlak mah se ṭha takin a khel ziah," a ti. Belgian coach hian Nations League khelh mekah Billy Gilmour leh Lewis Ferguson te a hmang ṭhin a, McTominay dam hunah a chhawrna tur hriatthiam a har.

Scotland hi zanin dar 12:15-ah Switzerland nen an inhmachhawn dawn a, Tartan Army (Scotland sawina) hi Slovenia nen an inhnehtawk avangin point khat chiah an nei a, Switzerland an hneh a nih chuan group E hmahruaitu an ni thei ang.