Zanin aṭangin Favang tournament

Mizoram Basketball Association (MBBA) buatsaih Favang tournament chu zanin aṭangin ṭan a ni dawn a, Mizoram Super League hnua inelna hmasa ber a nih avangin basketball ngainatute tan thu lawmawm a ni.

Favang tournament-ah hian MSL club pariat, D League club pasarih leh Women's club pali te an tel dawn. MSL leh D League club te hi anmahni league-ah ve ve pool A leh B-ah ṭhen an ni a, pool pahniha a sang pahnihin semifinal an khel ang. Hmeichhe lamah erawh an inkhelh kual hnua a sang pahnihte final-ah an inhmachhawn dawn thung.

MSL Champion zo hlim Khatla TBL chu Favang tournament-ah hian champion lai an ni a, H. Laldinsanga (Mapuia) enkawl TBL hi club boruak ṭhat lai tak a nih avangin champion nawn an beisei ngam ang.

Chutihrualin an elpui ber ṭhin Zarkawt BCA sawi hmaih an thiang lo a, Mizo player ṭha rual kawl ṭhintu BCA hi H. Lalhruaitluanga'n enkawl niin, MSL nomawi an kawl lai chhuhsaktu TBL nomawi chhuhsak let ve ngei a tum dawn.

Champion tura rinkai zingah Zemabawk Basketball Club an la awm bawk a, ZBBC hi tun hnaia TBL leh BCA rawn el pha ber an ni. Zemabawk club hi MSL hnuhnung bera BCA hnehna final lut thei an ni a, player langsar Lalruatkima leh Lalhnehpuia te an lak luh bawk avangin an thawm a len leh ber a rinawm.

Anni bakah hian Saron BC, Chanmari BC, Dawrpui Hotshots, Ramthar Vanguard leh Chaltlang BC te pawh rinkai ni lo mah se, club lian zawkte barakhaih thei tur khawpa ṭha an ni a, Favang tournament a hot dawn.

Favang tournament hi Hawla Indoor Stadium, Republic Vengthlangah khelh a ni dawn a, a hmunah en man a awm dawn lo. MBBA YouTube channel-ah live-a pek chhuah a ni bawk ang.