Zanin dar 7-ah Chhinga Veng Vs Chanmari

Mizoram Premier League Season 8-ah knockout round a awm aṭanga la thleng pha ziah Chanmari FC dinhmun a derthawng a, S. Malsawmtluanga awm loh hnua coach nghet nei lo club hi panganaah an awm mek. Zanin dar 7:00 hian Lammualah Chanmari hian Chhinga Veng an hmachhawn dawn a, inkhel pawimawh a ni.

Chanmari leh Chhinga Veng hi an intawn hmasak ṭumin 2-2 in an inhnehtawk a, hemi ṭum hian Chanmari hi an vannei hle. An goal hnih khung hi Chhingcows tlarhnung tihsual vanga lut ve ve a ni. Tun ṭumah erawh hun kal tawh theihngilh a ṭul a, zanina an inchuh point thum hlut zia an hriat fiah a ṭul hle.

Anand Gurung leh Lalremruata te kaihhruai Chhinga Veng hian hnehna an chang a nih chuan point 20 an hmu tawh a, a sang pali zingah an awm zel ang. Chutihrualin Chanmari zawk an chak a nih chuan point 18 an hmu ang a, Chhinga Veng chungah an awm dawn avangin a sang pali zingah an awm dawn.

Chanmari hian an match hnuhnung berah Electric Veng nen inhnehtawk mah se khelmualah an game a nung leh tawh a, champion thei team an ni tih an lantir leh tawh. Chhingcows pawhin an match hnuhnung berah Chawnpui FC 5-2 in an sawp a, tun inelnaah goal 21 an khung tawh avangin Chanmari tlarhnung tan dan a awlsam lo ang.