Semifinal-ah Satwiksairaj leh Chirag

Indian badminton singles player ten beisei an phak lohna hmun China Open-ah Satwiksairaj Rankireddy leh Chirag Shetty te ṭangdun chuan men's doubles semifinal an in vaw kai.

Ningani zan khan Thailand Open final-a an hneh loh Li Junhui leh Liu Yuchen te an hmachhawn leh a, minute 43 chhungin Indian pair hian 21-19, 21-15 in hnehna an chang. Satwiksairaj leh Chirag te hian game hmasa zawkah 3-0 a hma hruai nghalin an kaltluang hle a, baseline lamah Satwiksairaj chevel a hmuhnawmin Chirag-a'n a chet ranna hmangin net bawr vel a veng hneh hle bawk.

Game hnihnaah erawh world number 9 pahnih hi an chungnung thei bik lutuk lo, mahse point khat lek leka hma an hruai hnuin point 10 an neih tlin hnuah hma an sawn dawrh a, hnungtawlh tawh loin an tlang. India tlangvalte hian final lut tur chuan seeded pakhatna Marcus Fernaldi Gideon leh Kevin Sanjaya Sukamuljo te an paltlang leh a ngai dawn a, an hna a sawlsam dawn lo hle.