Davis Cup aṭangin Cilic inhnukdawk

Ram leh ram mipa tennis team hmanga inelna Davis Cup aṭangin Marin Cilic a inhnukdawk a, champion lai Croatia chuan an thiampuipa tel loin Russia an hmachhawn a ngai dawn tihna a ni.

Season hmasa khan Croatia hian France hnehin an champion, kuminah hian November 18 aṭangin Spain khawpuiah Davis Cup finals khelh tur niin Russia nen an inhmachhawn leh ang. US Open champion hlui Cilic chuan, "Ka khup nain harsatna min la siam chhunzawm zel a, ram tan inlan ngei duh mah ila ka inkhel thei dawn lo. Hliam hian dam lam chu a pan mek a, in enkawl tur erawh chuan hun ka la mamawh hnem deuh a ni," tiin a sawi.

Cilic hmun ruak luah tur hi puan a la ni lo a, beisei dan chuan kum 40 mi Ivo Karlovic chu an koh rin a ni. Borna Coric, Mate Pavic, Ivan Dodig leh Nikola Mektic te chu squad-a awmsa an ni.