Japanese boxer Inoue-a duai lo

Naoya Inoue chuan world bantamweight title pahnih kawl turin World Boxing Super Series final-ah Nonito Donaire chu unanimous decision (116-111, 117-109, 114-113 )-in an hneh a, IBF title a kawl sa piahlamah WBA (Super) title a kawl belh leh ta. 

Kum 26 mi Inoue hi weight pathumah a champion tawh a, vawi 19 fight a hmachhawnah a khingpuite la hneh vekin vawi 16 chu a knockout thei - Asian boxer ropui a nihna piahlamah khawvel huapa hming langsar ni turin kawng dik a zawh zel. 

Inoue chuan, "Donaire kha fighter ṭha tak a ni a, ka mit bula min hnek 'kak' kha ka career-a ka tawn hmasak ber a ni. Kha thil vang khan round hnih hnuah khan duh ang taka meng fiah lo chungin ka khel a, ka chak thei hi ka lawm hle a ni," a ti. 

Japanese boxer Inoue-a'n a hneh tak Nonito Donaire hi kum 36 mi a ni a, vawi 46 fight a hmachhawna vawi ruk a tlawmna a ni - weight division paliah a lo champion tawh.