Bahrain GP-ah Antonelli chak a tum

Mercedes driver Andrea Kimi Antonelli chuan Bahrain Grand Prix lo awm turah hnehna chan ngei a tum a, Azerbaijan GP-a pakhatna a teammate George Russell chu khum a tum thu a sawi.

Kum 20 mi Antonelli chuan, "Intlansiak leh hmasa berah chuan hnehna chan leh ngei ka tum tawh ang. Baku-ah kha chuan kum upa tawh tak motor khalh ang chauh ka ni a, Antonelli tak tak inhmuh ka ring lo. Mahse intlansiak a awm leh nghal avangin rang taka insiamṭhatna hun a awm tihna a ni," a ti.

Italian driver hi Driver's table-ah hmahruaitu a ni a, mahse Baku City Circuit-ah a teammate Russell chu pakhatna a nih laiin panganaah a thleng thei hram a, Russell nen an inthlauhna chu point 66 chauh a ni tawh.

Tun season-ah Antonelli a che ṭha a, kumin March-a Chinese GP-a hnehna a chan hnuah table-ah amah tluktu an awm lo. Podium vawi 12 lawn tawhin vawi riat zet a chak tawh a, amah hnaih bertu British driver Russell (3) aiin vawi ngain a chak hnem zawk.

Mahse tun hnaiah chetsual a nei zeuh zeuh a, a teammate Russell erawh hmasawn zawngin a che ve thung. Intlansiak vawi riat la awm turah Antonelli hi a che ṭha chhunzawm lo a nih chuan uiawm takin driver dangin an champion khalh thei.

October 4, Pathianni hian Bahrain GP a awm leh nghal dawn a, mahse West Asia-a indona vangin Malaysia-ah tlan a ni dawn a, Malaysian GP an neihna hmun Sepang Circuit-ah kumin Bahrain GP an tlan dawn.