Kum tharah Rodrygo lo kir dawn

Real Madrid forward Rodrygo Goes chuan dam lam pan mah se, kuminah a lo kir a rinawm loh a, kum thar January hma chuan a inkhel dawn lo niin Spanish chanchinbute chuan an tarlang.

Kum 25 mi Rodrygo hi kumin March khan Getafe nen an inkhelh ṭumin a khupah (ACL) hliam a tuar a, hemi hnu hian a inkhel leh tawh lo a, kumin World Cup-ah pawh ram tan a inlan ve thei lo.

Tun hnaiah Brazilian forward hian hma a sawn a, Thawhṭanni khan training a zawm a, inkhel leh thei turin a thawkrim hle. Rodrygo hi season hmasa khan bench luah lumtu a ni a, a inhliam hmain match 19 khel ve hman mah se a tam zawkah bul a ṭan lo.

A lo kir leh hunah Jose Mourinho hnuaiah rinrawl a ni phâk ang em tih zawhna a awm ṭan der tawh. Kylian Mbappe leh Vinicius Junior te chu khawih chet thiang lo tluk an ni a, Brahim Diaz a awm bakah Endrick a kir leh tawh a, Yan Diomande an neih thar avangin hmun chang tam tura an inchuh a ngai dawn.

Real player inhliam zingah Eder Militao chu October-ah a lo kir theih beisei a ni a, Brazilian defender bakah hian Ferland Mendy pawh a lo kir hnai nia sawi a awm. Mendy hian training a zawm tawh a, mahse inkhel tak tak tura a la inpeih a rinawm loh thung.