Ireland leh Israel an la buai

Football Association of Ireland (FAI) chuan Israel nen Nations League-a an inkhelh ṭuma, an player Adam Idah chi inthliarna rawngkaia auh nawmnah a nihna chu an chhui dawn a, an inkhelh zawh hnuah pawh ram pahihten buaina an neih chhunzawm zel.

Pathianni zan inkhelah hian Irish midfielder Jayson Molumby chuan inkhelh laiin, match official hnenah a teammate Idah chu Israel fans-in an au nawmnah tih a hrilh. Mahse inkhelh banah official te chuan eng inauh nawmnahna mah an hriat loh thu an sawi thung.

He inkhelah hian Republic of Ireland chu 3-0 in an chak a, boruak tawt tak karah ram pahnih player te aṭangin lungawi loh an lantirna hmuh tur a awm nuk. A tawpah Ireland dingchangin Idah chuan an goal hnihna hi a khung nghe nghe.

FAI chuan ngawihsan mai loin UEFA bulah an zualko a, mahse thuneitu lamin engmah an hriat loh thu leh finfiahna a awm loh avangin an chhui zui thei lo tih an sawi.

Hetiang a nih hnu hian FAI-in an la tawpsan mai lo a, khelmual sira microphone an dah aṭangin Idah chu auh nawmnah a ni em tih an chhui leh dawn. An sawi anga Idah hi Israel fans-in an lo chhaih a nih chuan UEFA hnenah thlengin hma an la chhunzawm tawh ang.

Hetihlai hian FAI hian October 5, Pathianni zana Israel nen an inhmachhawn leh hmain UEFA bulah an thlen hman dawn em tih a la chiang lo. Ireland hian zanin dar 12:15-ah Australia an mikhual dawn a, khelmual pawna an buaina vangin an inkhel hian ngaihven a hlawh leh ang.