Lakers innghahna thar Doncic

Los Angeles Lakers chuan Thawhṭannia chanchinbu mite an hmachhawn ṭumin, Luka Doncic chuan LeBron James thlaka team-a hruaitu thar a nih chu sawi zuiin a tan chuan chawimawina tluk a nih thu a sawi.

Kum 41 mi LeBron-a'n a contract a tawp hnuah kum riat chhung a lo awm tawhna Lakers a chhuahsan a, Philadelphia 76ers chu free agency-in a zawm a, a fapa Bronny James erawhin a pa hi a zui lo thung.

American forward a chhuah takah chuan Doncic-a'n hmun ruak hi a luah dawn a, season tharah Lakers tan team khaipa ber tura ngaih a ni a, a mawhphurhna a sang dawn.

Kum 27 mi Doncic chuan, "Ka tan chawimawina a ni a, chutihrualin chona a ni tel bawk. Mahse chona thar hmachhawn hi nuam ka ti. Ka career-ah team captain ka lo ni ve tawh ṭhin a, chuvangin ka tan chuan thil thar a ni lo. ka phur phah zawk a, hliam vanga ka chawlh rei tawh avangin ka inkhel châk tawh takzet," a ti.

Slovenian point guard hi season hmasa khan regular season tawp lamah, Oklahoma City Thunder nen an inkhelh ṭumin a ke vei lam a tina a, match 65 a khelh tlin loh avangin Most Valuable Player (MVP)-ah thlan a ni lo a, a tel loin Lakers-in second round-ah Thunder an hneh lo nawn.

Tun dinhmunah Doncic hi a dam ṭha tawh a, season tir aṭangin a inkhel nghal thei tawh dawn. LeBron awm tawh lo mah se a teammate te nen champion tumin tha tharin an ṭang ang.

Lakers hian tun nipuiah player an la lut nasa a, Walker Kessler, Collin Sexton, Sandro Mamukelashvili, Quentin Grimes, Jaden Hardy, Kevon Looney, Ziaire Williams, Arthur Kaluma, William Kyle III leh Cole Swider te an seng lut tawh.

Chutihrualin player parukin an chhuahsan ve thung a, James bakah Rui Hachimura, Jaxson Hayes, Luke Kennard, Deandre Ayton leh Marcus Smart ten Western Conference club hi club dang an zawmsan.