Captain nihna aiin goal a pawimawh - Sokratis

Arsenal striker Pierre-Emerick Aubameyang chuan Arsenal captain nghet a nih hnua a match hmasa ber a khel dawn, Gunners hian zanin dar 11:00-ah Leicester City an lenchilh ang.

Gunners defender Sokratis Papasta-thopoulos chuan an club tana Aubameyang pawimawhna a hmu fuh a, captain thar a nihna aiin a goal khung chu an mamawh zawk thu a sawi. Unai Emery nauate hi tun hnaia inelna an hmachhawn hrang hrangah match li chhung chu chak ni hmel an hmu lo a, zaninah pawh hian rinkai ni lo zawk chungin an inlan dawn.

Greek tlangval Sokratis chuan, "Aubameyang hna chu goal khung a ni a, captain a nihna aiin tun ṭumah pawh hian a pawimawh zawkah ka ngai. Kan team hi chhungkua ang mai kan ni, player tinin mawhphurhna kan nei vek, kan hna ṭheuh ṭha taka kan hlenchhuah a ngai," a ti.

Arsenal hmachhawn tur Leicester City hian Arsenal ang lo takin an match hnuhnung paliah hnehna an chang vek a, 2016 ang khan Premier League nomawi chawi an tum ngam lo a nih pawhin a sang pali zinga tel beisei ngam zinga mi an ni.

Sokratis chuan, "Foxes hi an boruak ṭhat vanglai a ni a, hnehna chan duha tuihal an ni. Kan inkhel tur hi a pawimawh a, season tawpa thlen san kan duh a nih chuan kum tluanin ngelnghet taka kan kal a ngai," a ti.