Rohit Sharma hoin India chak

India chuan Bangladesh nen T20 series an khelh mekah Ningani zan khan Rajkot-ah mikhual team hi wicket riatin an hneh a, series-ah 1-1 a ni chiah. T20 match hnuhnung ber hi Pathianni zan dar 7:00 hian Nagpur, Maharashtra-ah khelh a ni ang.

Men in Blue hi ṭhumvawrah chakin vawm hmasak an thlang a, Bangladesh hian Mohammad Naim (36), Soumya Sarkar (30) leh Mahmudullah (30) te chet ṭhat zarah run 153/6 an siam. India erawhin target pangngai tak hi awlsam takin an umpha. Virat Kohli hahdam vanga captain Rohit Sharma-a'n ball 43 lekah run 85 a vaw chhuak. Rohit hian T20I match 100 a khelhna chiah a ni a, a chet ṭhat avangin India hian over 15.4 lekah wicket hnih lek hlohin target 154 an tlin.