League Winner tur a chiang lo

Mizoram Premier League season 11 aṭangin League Winner siam ṭan a ni a, Aizawl FC-in hneh loh nei loin nomawi an chawi ve ve. Kuminah erawh round 10 khelh zawhah Aizawl FC hi pakhatnaah awm mah se Chanmari nen an inkarah point hnih chauh a awm.

Aizawl FC hian Ramthar Veng FC, Mizoram Police FC, Saikhamakawn FC leh Kanan FC te an la hmachhawn dawn a, Chanmari FC-in Dinthar FC, Saikhamakawn FC, Kanan FC leh MLS FC te an la hmachhawn dawn. An khelh hma bakah duh thlan tur zawk hriatthiam a har hle.

Chutihrualin Chanmari FC-in Steven Dias hnuaia Aizawl FC an hneh nghal avangin an phur thar dawn a, point hnih chauha an phak loh bawk avangin an la chawi ngai loh League Winner nomawi chawi turin beiseina thar an nei ang.