Bayern mualah Dortmund

German champion Bayern Munich chuan zanin dar 11:00 hian an elpui Borussia Dortmund an mikhual dawn a, manager lailawk Hansi Flick tan khawvel hriata hming chherna hun ṭha a ni thei ang. 

Bayern hian Niko Kovac an ban hnua an match hmasa zawkah Olympiakos 2-0 in an hneh thei a, zanin pawh inrintawkna an nei ang. Dortmund pawh table lama chungnung zawk an nih bakah Inter Milan ngamtu an nih bawk avangin zuam chi an ni dawn lo.

Bundesliga lamah beisei an phak loh vangin Bayern-in manager an ban a, a thlaktu tur a la hriat loh. Croatian manager an ban hlim khan assistant coach Flick-a'n Olympiakos leh Dortmund lakah team a enkawk dawn tih an sawi, a hnu lam erawh manager nghet kuta awm tura ngaih a ni.

Managar langsar hrang hrang nen Bayern hi sawi zawm an ni a, an sawi hnaih ber Arsene Wenger chuan tun hnaiah inbiakna an neih loh thu a sawi! Arsenal manager hlui hi tun season chhung atan contract an zawrh dawn tiha sawi awm mah se thu a chiang leh ta lo.

Kum 70 mi Wenger chuan, "Tun hma hun liam tawhah khan Bayern hi ka zawm teuh hle, tun hnaiah erawh inbiakna a awm lo. Kan inbe lo a, inbiakna a awm dawn em tih pawh ka hre lo," tiin a sawi.

Bundesliga table-a palina ni chungin Bayern hian Dortmund an mikhual dawn a ni a, hnehna an chang a nih erawh chuan Dortmund kal kanin pahnihna dinhmun an luah daih thei dawn.

Manager chungchangah thu mum an nei thei rih lo a, league match hnuhnung berah Eintracht Frankfurt 5-1 ngawta an ngam loh avangin an boruak ṭhat vanglai chu a ni lo, tlarhnung rem phui a ṭul dawn. Tlarhnungah Niklas Sule leh Lucas Hernandez te hliam vanga an inlan theih dawn loh avangin, ball thiam Jadon Sancho, Marco Reus leh Mario Gotze ten goal khung theihna hun an insiam thei tura ngaih a ni.

Chutihrualin Bundesliga-ah Bayern Munich-in hun rei tak ro an rel tawh a, tun hnaiah result ṭha nei tawk lo mah se goal khung thiam Robert Lewandowski leh an player dangte hi hming hraw tak vek an ni.

Hertha BSC    08:00 PM    RB Leipzig

Mainz 05    08:00 PM    Union Berlin

Schalke 04    08:00 PM    Fortuna Dusseldorf

Paderborn    08:00 PM    Augsburg

Bayern Munich    11:00 PM    Borussia Dortmund

Borussia M'gladbach    06:00 PM    Werder Bremen

Wolfsburg    08:00 PM    Bayer Leverkusen

Freiburg    10:30 PM    Eintracht Frankfurt