Raphinha-a'n India hmachhawn thei dawn lo

Barcelona thiampuipa leh season duhawm tak hmangtu Raphinha chuan India a hmachhawn ve thei dawn lo a, Thawhlehnia Australia nen an inkhelh ṭuma a inhliam avangin Barcelona-ah a kir.

Brazil hian Nilaini khan Australia chu 4-2 in an hneh a, inkhel hmasa zawka 1-1 a an lo draw pui tawh lakah hian Vanderson, Raphinha (penalty), Bruno Guimarães leh Vinícius Júnior (penalty) ten goal khat ṭheuh an khung.

Mahse, Raphinha hi second half-ah lakchhuah zui a ni a, hliam tenau a nei. Brazilian Football Confederation chuan nimin khan thuchhuah siamin, an player pawimawh a inhliam thu hi an sawi a, India hmachhawn thei dawn lo.

Catalan chanchinbu lar Mundo Deportivo chuan Raphinha hliam hi endik a nih tawh thu sawiin, inven nan chauha thawn haw a nih thu an sawi a, a hlauhthawnawm lo.

Kum 29 mi Raphinha hian Barca tan season duhawm tak a hmang mek - inelna hrang hrangah match riat khelin, goal 14 a khung tawh a, assist vawi thum a nei tel.

Brazilian forward inkhel en châk Indian fans ho tan chuan Raphinha lo kal thei lo tur hi a uiawm vawng vawng ang - India nen hian October 3, Inrinni hian Kolkata khawpuiah an inkhel dawn.

Hetihlai hian India leh Brazil inkhel ticket hi beisei angin hralh zawh a la ni lo! Tunah hian Rs. 3,500, Rs. 5,000, Rs. 6,000, Rs. 7,000, Rs. 9,000, Rs. 15,000 leh Rs. 18,000 man ticket engemaw zat a la awm a, AIFF lamin offer an siam hial!

India leh Brazil inkhel tur ticket hi district.in-ah online-a lei theih a ni a, general stand bik atan code 'STYLEBAAZAR50' tih hmangin, ticket pakhat manin ticket pahnih a neih theih a ni.