Lawmawma a inlar; Robert leh Ruatfela chak zo lo

Mizoram Labour Link LPS Pro Fight 2026 zan 18-na chu Thawhlehni zan khan neih a ni a, Lightweight-ah mipui hmuh châk Lallawmawma inlanin, kumina a inhnek hmasak berah technical knockout hmangin a chak nghal.

Bantamweight-ah mipui ngaihven hlawh zinga mi Tuirial boxer, C. Lalruatfela chu Dolrich Zothansanga lakah split decision-in a chak lo a, lightweight-ah LV Robert Lalengliana chuan uiawm takin seeded boxer, Mickey Lalbiakzuala a hneh zo lo bawk.

Lawmawma nge nge

Welterweight champion lai Lawmawma'n a kawnghren kalsanin, weight hniam zawk lightweight-ah a insawn a, weight hrangah a zawna champion a tum avangin mipui nghahlelh a hlawh.

Tuipui boxer Lawmawma a hmuhnawm nghal a, a tirah a nawr na nghal lo thung. A khingpui Israel Thangliana-a'n footwork ṭha tak nen a lo hmachhawn a, boxer pahnih an fimkhur dun hle.

Mahse, Lawmawma dan reng theih a ni lo a, round khatnaah chiang zetin Israel-a a hnek tlu nghal. R Vanhne tlangval Israel-a lu a hai a, mahse ṭha taka tho lehin round hnihna thleng a khel tluan thei.

Round thumnaah erawh Israel-a a inveng reng thei lo a, an inhnek a tawp nan minute khat pawh awm tling tawh loah referee-in an intumtawk lo nia a ngaih avangin a titawp a, TKO-in Lawmawma a chak.

NTP boxing team-ah Tuipui tlangval hian kumin Pro Fight ṭan hmain training a nei tawh a, an inhnek chung zawngin Israel-a a nawr lui duh lo a, weight thara champion a tumna kawngah a fimkhur hle.

Lawmawma chuan, "Pro Fight hmain thla thum bawr vel training ka nei tawh a, weight dangah khel tawh mah ila ka khelh dan leh inbuatsaihna thlirin champion ngei ka inbeisei a, ka tum bawk," tiin Vanglaini a hrilh.

Nikum Mega Boxing-a a hneh loh Lalruatmawia nen an intawn leh theih dan tur chungchang zawhna chhangin, "Ka hneh loh kha vanduai vang a tih theih a, kan intawng leh a nih pawhin huphurhna ka nei hran lo. Ka hneh ngei tawh turah ka inngai," a ti bawk.

Ruatfela & Robert

Bantamweight inhnek hnuhnung zawkah kumina mipui ṭan hlawh, Ruatfela'n seeded ni phâ Dolrich-a a hmachhawn a, Tawnhriat nei ṭha Dolrich-a lakah Tuirial boxer Ruatfela a khel chhe lo. A tawpah judge zinga pakhat chauhin Ruatfela a chungnung zawkah a ngaih avangin split decision-in a chak lo.

Lightweight-ah kumina che ṭha tak Robert-a'n seeded boxer Mickey Lalbiakzuala a hneh zo lo a, Tuipui Ferry tlangval hi che chhe lo mah se match dang aiin a hnek chhuak tlem a, New Vervek boxer Mickey-a a dingchang zawk.