England-in goal hnih an khung

World champion Spain an ngam loh hnuah England an chak a, an mikhualna ramah Czech Republic chu 2-0 in an hneh - UEFA Nations League-a match hnih an khelh tawh aṭangin point thum an nei tihna a ni.

Hetihrual hian an mikhualna ramah England hi in chhuang viau thei an awm lo a, an vannei - Czech player hlauhawm bera chhal ngam Pavel Sulc chu minute 25-na lekah Elliot Anderson laka a chet dan hlauhawm tak avangin hnawhchhuah a ni a, rei lotêah a tam zawk ni chungin England an khel nghal.

Mahse, Three Lions hian first half chhungin goal erawh an khung chuang lo a, second half ṭan aṭanga minute hnihna lekah Anthony Gordon chuan a khung thung - Trent Alexander Arnold-a ball pek duhthusam chu Barcelona forward hian goal-ah a lo chantir a, 1-0 a ni.

October 2024 hnu a vawi khat nana England tana bul ṭan Trent Alexander-Arnold a hmuhnawm a, Thomas Tuchel-a'n World Cup-a a hruai lo ringawt kha tifuh lo a inti tawh mai thei!

England an hlauhawm chhunzawm a, minute 69-naah goal an khung belh ta nge nge - Czech tlarhnungten ball an petchhuah theih loh hnuah Three Lions captain Harry Kane-a'n goal khung loa awm a thiam lo tih pholangin, an goal hnihna a khung a, 2-0 in England an chak.

Bayern Munich striker Kane hian England tan match 123 khel tawhin, goal 87 zet a khungsak tawh a, Three Lions tana goal khung hnem ber a nihna record chu a belhchhah.

England hian October 3, Inrinni zanah Nations League hi an khelh chhunzawm dawn a, Croatia an lenchilh ang. October 6, Thawhlehni zanah an hneh tak Czech Republic hi an lo mikhual ve leh bawk ang.