Klay Thompson a phur tawh

Miami Heat player thar Klay Thompson chuan NBA season tharah, a club thar tan a theihna zawng zawng a hlan tur thu sawiin champion pui ngei a duh a, a phur tawh hle.

Kum 36 mi Thompson chuan, "Inkhelh ka chawlhsana ka career ka thlir let hunah ka theihna zawng zawng ka hlan tia sawi theih ka duh a, Chutiang thil tithei tur chuan Heat hian chance ṭha tak min siamsak. Ka team thar tan theihtawp chhuahin ka khel dawn a, nomawi chawipui ngei ka tum dawn a ni," a ti.

American Shooting Guard hian thla hmasa khan Dallas Mavericks-a a contract a tihtawp hnuah Heat hi a thlawnin a zawm a, a inkhelh chhunga a larpui ber no. 11 a ha leh dawn.

Thompson hian kum 13 zet Golden State Warriors tan a khelh hnuah 2024 khan Mavs hi a zawm a, Warriors a chhuahsan hnuah beisei a pha lo hle. Mavs-a kum hnih a awm chhungin match tinah point 12.9 nei ang a ni a, three point line aṭangin 39% a score bawk.

Season hman zawh takah khan Thompson hian Mavericks tan match tinah point 11.7 leh rebound 2.1 nei ang a ni a, club-ah a tlaktlum loh avangin a chhuak dawn tih thawm a tam a, Los Angeles Lakers a zawm dawn anga sawi a awm bawk.

Mahse a tawpah chuan Heat a zawm a, a career-a a vawi khatna atan Eastern Conference-ah a inlan dawn. Heat hian Giannis Antetokounmpo an lo la lut tawh a, MVP vawi hnih lo ni tawh bakah hian Bobby Portis leh Tim Hardaway Jr. te an lo seng lut tawh bawk.

Thompson hian Warriors a chhuahsan hnuah khel ṭha tawk loin, sawisel kai nasa mah se a tawnhriat ngahna hi Heat-in an chhawr ṭangkai thei dawn. Warriors tan vawi li champion-in Stephen Curry nen 'Splash Brothers' tih hiala koh an ni ṭhin a, All Star-ah vawi nga lai thlan a ni tawh bawk.

Hei bakah hian NBA chanchina three points luh hnem lamah palina a ni a, Curry, James Harden leh Ray Allen te chiah a tluk lo a, a khelh dan enin Allen hi a khum theih a rinawm.

Heat shooting guard Davion Mitchell chuan, "Vawi li lo champion tawhin min rawn zawm thei hi a lawmawm ka ti takzet a, champion tuma kan zinkawngah a pawimawh dawn hle," tiin a teammate thar tur a dahsang hle.