Pro Fight: Hmingdailova a inlan leh dawn

Mizoram Labour Link LPS Pro Fight 2026 zan 20-na chu zaninah chhunzawm a ni leh dawn a, inhnek 10 en tur a awm leh dawn - flyweight-a boruak nei ṭha zinga mi Hmingdailova a inhnek leh dawn.

September 28, Thawhṭanni zanah Hminga'n kumin inelnaa rawthar che ṭha tak, Khatla East boxer Benjamin Lalthantluanga a hneh a, Hminga'n Ben-a a ngam hle.

A inhnek hnuhnung ber aṭanga zan thumnaah Ṭawipui South boxer hi a inhnek leh nghal dawn a, Tuipui boxer Zothanpuia nen an inhmachhawn dawn a, quarterfinal luh inchuhna a nih avangin inhnek hmuhnawm a beisei ngam.

Zuitea Fitness & Boxing Gym-ah Hminga hian training a nei mek a, Pro Fight-ah vawi thum lo tel tawhin, nikum khan professional-ah a lo inhnek tawh bawk avangin tawnhriat a nei ṭha.

Chutihrualin a hmaa ding tur Nicky hi Pro Fight-ah a mikhual lo a, seeded a nih bawk avangin Hminga tan awlsam taka chak theih a ni dawn bik lo a, zanin inhnek hawngtu an nih dawn bawk avangin a tir aṭangin boruak a sang nghal ang.

Anni bakah hian kumina an chet ṭhat avanga langsar Thingsulthliah tlangval, PC Laldinthara leh Maubuang boxer Lalrinhlua te an inlan leh dawn bawk a, weight tina inhnek tur hi round of 16 a nih tawh avangin inhnek hmuhnawm an chhawpchhuah vek a beiseiawm.

Pro Fight hi LPS Arena-ah neih niin, a hmuna en man hi Rs 50 a ni a, LPS YouTube channel-ah member tan live-in a en theih bawk. Member nih man hi Rs 179 a ni.