Haaland-a chhuak dawn em?

Manchester City goal khung khawl Erling Haaland chu a khelh mekna club-in thiam loh an chan avangin a dinhmunin ngaihven a hlawh thar a, division hniam zawkah Man City an relegate tir a nih chuan Haaland a chhuah ringtu an tam hle.

City hi dan bawhchhiat chungchanga thubuai 115-a 114 zetah thiam loh an chang a, hremna erawh tichhuah a la ni lo thung. Citizens hi relegate tir an nih chuan an player tam takin an chhuahsan a rinawm.

An zingah Haaland hming a ri ring zual a, nikum kumtir khan 2034 thleng daih tur contract a ziah vang a ni. City leh an goal khung thiam bik striker hi an inremnaah release clause a awm lo a, chuvangin Manchester khaw club hian an duh chen chen an kawl thei dawn.

Kum 2006-a match fixing vanga Juventus an relegate tir ṭum khan, an player langsar tam takin an chhuahsan nghal a, an zingah Fabio Cannavaro, Lilian Thuram, Gianluca Zambrotta, Zlatan Ibrahimovic leh Patrick Vieira te an tel.

Chutihrualin City first team player zingah mumal taka release clause nei an awm lo a, chhuah duh mah se an contract a tawp emaw City-in pawisa chawi tur an ngah vang emawa an hralh a nih loh chuan club dangah an hralh mai a rinawm loh.

Norwegian forward hi Bayern Munich-in Harry Kane thlak nan an duh nia sawi a awm a, City-in thiam loh an chan bawk avangin a chhuah leh chhuah loh tur an inrinsiak der tawh.

Kum 26 mi Haaland hi tun dinhmunah an ram tan Nations League khelin a feh chhuak mek a, zanin dar 12:15 hian Wales nen an inhmachhawn leh dawn a, Haaland hian bul a ṭan leh ngei a rinawm.