Ocon-a'n Haas chhuahsan dawn

Esteban Ocon chuan kum 2026 season tawpah a awm mekna Haas chu a chhuahsan dawn a, F1-a a tawpna tur a nih loh thu sawiin, a instagram kaltlangin a puang.

Kum 30 mi Ocon-a chhuah chhan tur hi chiang taka sawi lan ni lo mah se, beisei a phâk loh bakah chona thar hmachhawn a duh vang niin khawthlang chanchinbute chuan an tarlang.

Ocon chuan, "Haas nena kan thawhdunna chu 2026 season rual hian a tawp ve nghal dawn. He team nena kan thawhho tawhnate hi ka ngaihlu a, hun harsa tak tak kan paltlangte hi ka hre reng tawh ang.

Mahse hei hi F1-a ka tawpna tur a ni lo a, inelna hmachhawn châkin ka la tuihal. Tunah erawh kan hmaa Bahrain GP kan tlan tur hi ka dah lian ber a, intlansiak tam tak kan la hmachhawn dawn avangin Haas-a ka awm chhung chuan ka theihtawp ka chhuah dawn a ni," a ti.

French driver Ocon hi kum hnih chhung Haas-ah a awm tawh a, F1-ah a la champion thei chuang lo. Ocon hian 2017 khan Force India-a a awm laiin pariatna dinhmun a lo hauh tawh a, 2022-a Alpine tan a tlan lai khan point 92 hmuin pariatna bawk a lo ni tawh a, hei hi a thlen san ber a ni.

Kuminah pawh beisei a la phâk chuang lo a, September 26, Pathiannia Azerbaijan Grand Prix an tlan ṭum kha a chet ṭhat ber a ni a, Baku City Circuit-ah hian point li hlawh chhuakin, pariatnaah a thleng a, tun season-ah a aia sangah a la thleng lo.

F1 driver's table-ah pawh Ocon hian point sarih hmuin 16-naah daih a awm a, podium vawi khat mah a la lawn lo. A teammate Oliver Bearman erawh point 20 hmuin 13-naah a awm thung a, Bearman pawh hian podium a la lawn bik lo.

Constructor's table-ah pawh Haas hi point 27 hmuhpuiin pasarihnaah an awmpui a, hmahruaitu Mercedes chu point 511 zeta an phâk tawh loh avangin an tan beisei tur a awm tawh lo tlukah a ngaih theih.