Police lehthalin Kananin table mawngphah an chhuahsan

Star Cement MPL13-ah Kanan FC-in Nilaini zan khan pathumnaa awm Mizoram Police chu 2-1 in an lehthal a, point sarih hmuin table mawngphah an chhuahsan. October 10, Inrinni tlai dar 3:00 hian Kanan hian table mawngphaha awm Ramthar Veng FC an hmachhawn dawn a, inkhel hmuhnawm bik a ni ang.

Ruah a sur nasat avangin RG Stadium-ah tui a tling nasa a, Police leh Kanan FC ten harsatna an tawk ve ve. Police tan B. Rosangliana'n minute 34-naah mual vei lam aṭangin a pet lut a, Kanan keeper Malsawmtluanga'n a tih tur a ti lo tawp! Team ṭha zawka ngaih Police-in goal an khung hmasak avangin chak tura ngaih an ni.

Second half-ah pawh Police-in nawr chhunzawm mah se goal an khung thei lo a, Kanan lamin chance an insiam ve reng bawk. Minute 68-naah Malsawmzela'n (Valpuia) a chance ṭha neih chu goal-a pet mai loin C. Lalthlanawma tan a siamsak a, Lunglei tlangval hian siphurh sut nan goal-ah a khung.

Police-in Kanan laka point khat chauh hmuh duh loin na takin an nawr a, keeper Mala a chesual nawn tawh lo. Injury time-ah Police defender Vanlalpeka'n Kanan striker Valpuia dang thei mah se a ball tih per chu a lak hman tawh loh avangin substitute Alfred Lalrinpuia'n goal-ah a chantir.

Kanan 2-1 in an chak a, table mawngphah an chhuahsan bakah an chunga awm Saikhamkawn point hnih chauhin an pha lo. Coach C. Zothantluanga hote hian round 6 aṭangin point an hmu ṭan chauh a, round hnuhnung panga aṭangin point riat an hmu.

Round 6 aṭanga round 10 bikah Chanmari FC (13 pts) in point an hmu tam ber a, Dinthar FC (9 pts), Aizawl FC (8 pts) leh Kanan FC (8 pts), MLS FC (7 pts), Mizoram Police (5 pts), Saikhamakawn (4 pts) leh Ramthar Veng (1 pt) te an dawt. Heta ṭanga thlir chuan Kanan hi semifinal khel thei dinhmunah an ding pha hial a, chutihrual season bul an ṭan chhiat avangin semifinal thlir loin relegation zone chhuahsan dan an zawn phawt a ṭul dawn.