Pro Fight : Hruaia inlan ve dawn ta

Mizoram Labour Link LPS Pro Fight 2026 zan 21-na chu zaninah chhunzawm leh a ni dawn a, bout 11 awm turah C. Lalhruaitluanga a inlan dawn a, 'main event' awm lo mah se mipui ngaihven ber tur a ni.

Cherhlun tlangval Hruaia hi Pro Fight-ah mi thar a ni lo a, kum 2023 khan lightweight title fight-ah HC Lalramfela a hneh zo lo a, a kum lehah title fight-ah vek Lalkhawngaiha lakah a vanduai nawn.

Pro Fight vawi 12-naah tha tharin Hruaia a inlan leh dawn a, zanin bout sarihnaah Malsawmkima nen an inhnek dawn. Vaphai boxer Malsawmkima hi kumina lightweight boxer-ah che ṭha ber zinga mi a nih avangin inhnek hmuhnawm a beisei ngam.

Kum 24 mi Cherhlun tlangval Hruaia hi kum danga Pro fight a khelh tawhnaah a che chhe ngai lo a, mahse a hmawr a bawk fuh theih ṭhin loh avangin champion kawnghren a la hreng thei lo. Kuminah erawh chetsual nawn a tum tawh dawn lo.

Chutihrualin kumin Pro Fight-ah Lightweight boxer an ṭha a, tawnhriat ngah leh hming langsar tak tak an tam. An zingah a hneh tawh loh Ramfela bakah, Lalruatmawia leh welterweight aṭanga insawn Lallawmawma te an awm a, kumina hmuhnawm pawl Lalrohlua Pautu a la awm cheu.

Hruaia hian champion a tum takzet a nih chuan a inthlahdah a thiang dawn lo a, kum dang aia lightweight boxer an ṭhat avangin a tir aṭangin tlo leh fei taka khel tura a inbuatsaih a ngai ang.

Zanin inhnek tur dangah bantamweight a hmuhnawm dawn bawk a, kumina che ṭha tak Biaklawmthanga leh Denis Vanlalsiama te a inlan dawn vang a ni. Hei bakah hian welterweight-ah Kolasin boxer Jeffrey Lalruatkima a inlan leh dawn bawk.

Pro Fight hi LPS Arena, Falkland-ah neih a ni a, a hmunah Rs 50 chawiin a en theih. LPS YouTube channel-ah member tan a en theih bawk a, member nih man hi Rs 179 chauh a ni.