Enkawla leh Ruatmawia chak nghal

Mizoram Labour Link LPS Pro Fight 2026 zan 19-na chu Nilaini zan khan neih a ni a, bout 10 en tur awmah boxer hming langsar an inlan hnem a, ngaihven hlawh zingah Vanlalenkawltira leh Lalruatmawia te an chak nghal a, quarterfinal an lut ve ve.

Enkawla a ṭha

Champhai Dinthar boxer Enkawla'n kumina a vawi khat inlannaah Pro Fight-a mikhual lo tak, N Lalhruaizela hmachhawn hi duhthlan theih ni se a thlan kher a rinawm loh.

Zan 19-na inhnek hawngtuah an ṭan bawk avangin a tir aṭangin boruak a sang nghal. Ṭawipui South tlangval Hruaizela chu Enkawla lakah chungnung zawkah ṭang thei lo mah se a khel chhe lo a, kumina che ṭha ber zinga mi a nih avangin thil mak a ni lo.

Chutihrualin Enkawla dan reng theih a ni lo a, round thumnaah a thiamna leh fitness ṭhatna lantirin a hnek chhuak nasa a, minute khat ṭha bak khelh tur awm tawh loah technical knockout-in Hruaizela a hneh.

Enkawla hian kum 2023 leh 2024 khan a zawnin title fight-ah a lo vanduai tawh a, kuminah erawh champion ngei a tum tawh hle. Professional-ah pawh lo inhnek tawhin ram pawnah hial a chhuak tawh

August thla khan Oriental and Pacific Boxing Federation (OPBF) super flyweight silver title fight-ah, Japanese boxer Hayate Hanada lakah a chak zo lo a, hnam dang boxer ṭha zawk zingah pawh a tel tawh avangin kumina flyweight kawnghren hlawh chhuak thei tur zinga beiseiawm ber a ni.

Hei le Ruatmawia

Lightweight inhnekah Ruatmawia'n hnehna a chang nghal a, Chhiahtlang tlangval hian H. Zomuanpuia chu unanimous decision-in a hneh a, quarterfinal lut turin harsatna a tawk lo.

Dan pangngaiin 'Diesel Engine' ti hiala an koh ṭhin Ruatmawia a fit ṭha lehpek a, Kolasib Khuangpuilam boxer Zomuanpuia lakah a chungnung zawkah a ṭang tluan thei.

Round hnihnaah Ruatmawia hi a inthlahdah deuh a, Zomuanpuia'n a hma aiin a nawr ngun zawk. Mahse round thum an khelh zawh meuh chuan Chhiahtlang tlangval a dingchang ta zawk.

Ruatmawia hi 2024 khan tawnhriat nei loin Pro Fight a vawi khat telnaah mipui ṭan a hlawh nghal thei a, nikum December-a Mizoram Boxing Association (MIZBA)-in a buatsaih Mega Boxing-ah khan a champion.

Mega Boxing a champion-na kawngah hian semifinal-ah, Pro Fight welterweight champion lai Lallawmawma a hneh. Tupui boxer hian kuminah a khelhna sawnin lightweight-ah a inhnek dawn a, Ruatmawia nen an intawng leh a nih chuan boruak a sang khawp ang.

Engtin zel?

Lightweight inhnek dangah Lalrohlua Pautu chu chak zel a, Kanan Veng tlangval hian Thanglailung boxer Vanlalchhuanawma chu split decision-a hnehin a vawi khat Pro Fight telnaah quarterfinal a lut nghal.

Bantamweight-ah boxer hmuhnawm Lalruatkima chuan a ke ruh a tih tliah avangin a inhnek chhunzawm thei lo a, champion tura rinkai zinga mi Rka hian inelna a hmachhawn theih loh avangin a khingpui tur Sebastian VL Rinnunga chu 'walk over'-in a chak a, quarterfinal a lut.

Quarterfinal hi October 5, Thawhṭanni zan aṭanga ṭan tur a ni a, round li khelh a ni tawh dawn. Weight tina quarterfinal lutte chu October 3, Inrinni hian an inbuk ṭha leh vek dawn.