Smalling-a'n Porto a zawm

Club nei loa awm Chris Smalling chuan Porto a zawm a, tun season chhung atan contract ziakin Smalling-a tan Saudi Pro League club Al Fayha hnua a club hmasa ber tur a ni.

Kum 36 mi Smalling hi season hmasa tawp rual khan Al Fayha-a a contract a tawp ve nghal a, English defender hlui hian châm chhunzawm a tum lo a, Scottish club Rangers nen sawi zawm mah se amah berin a duh lo nia sawi a awm bawk.

Season inṭan hnuah pawh Smalling-a'n club thar a nei mai lo a, mahse Porto an lo lang a, Portuguese club hian Manchester United defender hlui hmin turin hun an duh rei lo. A kum tam ve deuh tawh mah se an club-a khel turin an iai lo.

Smalling hi kum nga mi chauh a nih laiin a pain a thihsan avangin a nu leh a unaupa nen an khawsa ho a, chhungkaw hausa an nih loh avangin a naupan laiin academy-ah a awm rei lo a, non-league club tan hna thawk chung leh lehkha zirin pahin a khel ṭhin.

Kum 2006 khan kum 17 mi niin non-league club Maidstone United-in an academy-a awm turin an la lut a, a khelh ṭhat avangin kum khat hnu lawkah senior team-ah hlankai a ni.

Maidstone tan hmun chang tam lo mah se, English Schools' Football Association (ESFA) hnuaia English Schoolboys aiawha a feh chhuahnaah scout te mit a la ṭan a, 2008 khan Premier League club Fulham-in an la lut.

Fulham-a season hnih a awm chhungin match 20 a khel tling lo a, January 2010 khan Man United chuan Smalling hi an la lut a, mahse season tawp thleng Craven Cottage-ah loan-in a khel zui.

United tan Smalling-a'n hmun pawimawh a chang zui a, kum kaw chhung Old Trafford-a a châm chhungin match 206 zet a khel hman a, League-ah vawi hnih champion puiin Europa League, FA Cup leh League Cup nomawi pakhat ṭheuh a chawi hman bawk.

Kum 2019 khan loan-in AS Roma a zawm a, season khat hnuah Roma hian la nghetin Italian club tan season li a khel zui. 2024 khan AL Fayha zawm lehin Saudi-ah kum hnih a khel hman a, Porto hmaa a khelhna hnung ber a ni.