Zemabawk-in Chaltlang an sawp

Mizoram Basketball Association buatsaih Favang tournament chu Nilaini zan khan khelh chhunzawm a ni a, Zemabawk Basketball Club chuan Chaltlang Basketball Club 107-79 in an hneh nghal.

Nilaini zanah ruah sur nasa mah se inkhel entu an ṭhahnem a, ZBBC inkhelh vang a ni. Mizoram Super League finalist hi second quarter thlengin Chaltlang lakah an sang fal thei lo a, mahse third quarter aṭangin an zia an chhuah ṭan.

Lalropuia chuan point 38 zet a score a, Khatla tlangval Ropuia K. Lalthianghlima, Lalhnehpuia, Lalruatkima, Michael Lalṭhakima leh Lalrinchhana ten an thlawp ṭhat bawk a, MSL kai thar club Chaltlangin tan dan theih an ni lo a, Zemabawk an 'blow out'.

D League inkhelah MSL-a tawnhriat nei ve ve Tuikual South leh Chawnpui te an inhmachhawn a, 78-83 in Chawnpui an chak a, an inthlauhna hi point nga chauh a ni.

Favang tournament hi vawiinah chhunzawm leh nghal tur a ni a, hmeichhe team ten an khel ṭan dawn. Dar 10:00 AM-ah Bungkawn LB Associates leh Dawrpui Alpha te an inhmachhawn dawn a, dar 12:00 PM-ah Maxim SB leh Durtlang Mohicans te an inkhel ve bawk ang.

Tlai lamah D League club te an inkhel ve dawn a, dar 2:00 PM-ah Electric Veng BC leh College Veng BC te inkhelin, dar 4:00 PM-ah Ramhlun SC leh Tuikual South BC te an inhmachhawn dawn.

Zan dar 6:30-ah MSL club Saron BC leh kai thar Ramthar Vanguard te an intawng dawn a, Dawrpui Hotshots leh Chanmari BC te dar 8:30-ah an inhmachhawn ve thung ang.