Table chung berah Chanmari FC

Star Cement MPL13-ah nimin tlai khan Chanmari FC-in an hmelma Dinthar FC 1-0 in an hneh a, point 24 hmuin table chung berah an awm. Zo Clasico-ah Chanmari tan Lalthanzuala'n goal awmchhun a khung a, chhiarkawp dan thlapin semifinal khel turin an tling. Nizan khan Aizawl FC leh Ramthar Veng te an inkhel a, AFC hian hnehna an chang a nih chuan table chung berah an awm leh ang.

RG Stadium-a inkhelah Dintharin Durtlang Stadium-a an hneh tawh Chanmari FC hneh nawn tumin ṭan phat aṭangin attacking football an khel a, IFL club aiin an goal bawh a na zawk. Jerry Lalchhanchhuaha goal hmaah a hmui tawk lo a, Mawimawia freekick ṭha zet CFC keeper Zothanmawia'n a dang bawk.

Second half-ah Chanmari an vannei ta zawk a, box chhungah Dinthar FC-in ball an clear theih lawk loh an tuar. Lunglei tlangval HK Lalhruaitluanga'n ṭum hnih ngawt goal-ah a pet a, keeper J. Lalchhuanliana'n danga mah se a per chu TZ-a'n goal-ah a chantir.

Dintharin siphurh sut theihna hun ṭha an nei a, mah se substitute Lallawmawma leh defender ṭha Laltluangliana te goal hmaah an hriam tawk lo. Chanmari 1-0 in an chak a, table chung berah an awm. Dinthar erawh palinaah la awm chhunzawm mah se semifinal khel turin an dinhmun a la him lo. Maimawms hmachhawn leh turte hi MLS FC, Mizoram Police leh Saikhamakawn te a ni dawn a, point thum hmuh chianna tur a awm lo.