Vini hmachhawn ka châk - Apuia

Mizo midfielder ṭha mi Lalengmawia Ralte (Apuia) chuan Vinicius Jr hmachhawn a châk thu Vanglaini a hrilh a, Brazil meuh hmachhawn tur an nih avangin team pawh an phur thu a sawi.

Apuia chuan, "Vinicius hi ka hmu châk ber a, tunlai player ṭha ber pawl a nih avangin, eng ang taka ṭha nge a nih hmuh ka châk a ni," a ti - Vaivakawn tlangval hian Vini hi vawi khat a lo hmachhawn tawh.

Mahse, Apuia leh Vini intawn hmasakna erawh youth football a ni a, kum 2016 BRICS U-17 Football Cup-ah khan 3-1 in Brazil hi an hneh lo - Vini-a'n an goal thumna a khung nghe nghe.

Apuia chuan, "Vini hi a khel ang em, ka hre lo a, a khel a nih hlauh chuan dan ngei tumin theihtawp ka chhuah dawn. Goal chhuah hma loh kan thupui hmasa phawt ang a, chumi zawhah chuan game kal dan a zira kan beih let ka ring," tiin Vanglaini a hrilh.

India tana vawi 29 inlan tawh Apuia chuan, "Panama lakah result ṭha tak kan neih avangin kan phur a, kan team boruak pawh a ṭha," a ti a, Brazil hmachhawn tura inbuatsaihna ṭha tak an neih thu a sawi.

Zanina India leh Brazil inkhel tur hi Sony Sports Network chuan en theih turin a pe chhuak dawn a, online-a en duh tan Sony Liv-ah a en theih bawk ang.