Marquinhos hmaa fiahna hmachhawn tum Edmund

Tunlaia India forward 'hot' ber pawl Edmund Lalrindika'n zaninah Brazil a hmachhawn dawn a, player langsar tam tak karah Brazil captain Marquinhos hmaa a theihna fiah a châk thu Vanglaini a hrilh.

Edmund chuan, "Top defender a ni a, eng nge a hmaah kan an reng tih hriat ve hrim hrim ka châk a ni," a ti a, Brazil an hmachhawn thei tur chu a tan chuan mang ram ang mai a nih thu a sawi bawk.

Lunglei tlangval chuan, "India player tupawhin Brazil ang team ṭha hmachhawn hi chu kan dream a ni ang chu. Ka phur takzet a, kan hun lai ngeia hetiang match kan khel thei tur hi chu ka lawm takzet a ni," a ti.

East Bengal forward Edmund-a chuan sawi zawmin, "Thil thleng zen zen lo tur a ni tih kan hria a, a tute pawh kan phur a, kan inpuahchahna pawh a ṭha hle.

"Game lian a ni a, kan phak tawka a ṭha ber kan khelhchhuah ve theih kan beisei," tiin Vanglaini a hrilh a, an hun tawn rangkachak chu engmah lo maia chantir an tum lo.