Pistons-in Duren an thlung nghet

Detroit Pistons chuan an player Jalen Duren chu kum nga daih contract thar an ziahpui a, Duren hian a contract tharah hian dollar maktaduai 200 a hlawh dawn niin khawthlang chanchinbute chuan an tarlang.

Kum 22 mi Duren hi kum 2022 khan Charlotte Hornets chuan an draft a, mahse match khat pawh a khelh hmain New York Knicks-ah chhuahtir leh a ni a, a tawpah Pistons a zawm. Pistons hian kum li daih contract an ziahpui nghal a, club dang tan a la khel lo.

American center hi tun season-ah a contract hi a tawp tawh a, mahse Pistons chuan an player contract hi kum khat atan pawhsei theih dan an nei a, mahse October 1, Ningani hmaa inremna an neihpui ngei ngei a ngai thung.

Eastern Conference club hian Duren hi dawrin, kum khat chauh ni loin kum nga chhung atan inremna an neihpui ta a ni. Pistons tan an player ṭhangduang an chelh thei hi thil lawmawm a ni.

Duren hian season hmasa khan Pistons tan match 70 khelin bul a ṭan kim vek a, match tinah point 19.5, rebound 10.5 leh assist 2.0 nei ziah ang a ni. Eastern Conference-aha team hi pakhatna nihpuiin, Conference semifinals-ah Cleveland Cavaliers an hneh zo lo.

Season a hman ṭhat avangin Duren hi a career-a a vawi khat nan, kumin khan All Star-ah thlan chhuah zingah a tel ve a, NBA-ah player beiseiawm ber pawl a ni der tawh.

Pistons hi tun nipuiah an che na a, Jack Collins, Isaiah Joe, Taurean Prince, Kevin Huerter, Javonte Green, Ugonna Onyenso leh Ebuka Okorie te an la lut tawh a, Duren hma hian Ausar Thompson chu kum nga chhung atan an lo thlung nghet tawh bawk.

Hetihlai hian player panga - Tobias Harris, Isaiah Stewart, Caris LeVert, Marcus Sasser leh Gary Harris te chuan Eastern Conference champion lai hi an chhuahsan ve bawk.