Car accident-ah Hull midfielder a tel

Hull City midfielder Lucas Gourna-Douath chu Ningani zing dar 8:30 bawr vek khan, an club training ground bul Millhouse Woods Lane-ah a car-in a chesual a, a car chu kawngpuiah letin hliam an awm lo hlauh.

Helai hmunah tak hian Hull City player tho Sorba Thomas chu thla hmasa khan a lo chesual palh tawh a, Welsh winger pawhin hliam na tak a tuar lo.

Chetsualna thlenna bul lawka awm pakhat Paul Nickerson chuan, "Thawm ka hriat khan ka va chhuak nghal a, car chu a sir zawngin a lo let reng tawh. ka nupuiin kan fate school kal tura a thlah hnu lawka thil thleng a ni a, ka chhungkua ka chân ṭep a ni.

Hetiang thil hi a vawi khat thlenna a ni tawh lo a, chetsualna thlen hunlai hi a inang deuh tlangpui bawk. Chuvangin mi zawng zawng kan him theihna turin hmalak vat a ngai a ni," a ti.

Hull City thuneitute chuan Douath-a chesualna thlalak chu social media lama vawrh darh an duh lo a, thi leh hliam an awm loh chu lawmawm an tih thu an sawi bawk.

French midfielder Douath hian tun season-ah Hull tan match thum a khel tawh a, pariatnaa an awm theih nan player pawimawh a ni. Nations League a khelh loh avangin a chawl hahdam thei ang.