Zarkawt BCA an chak ve nghal

Mizoram Basketball Association (MBBA) buatsaih Favang tournament chu Ningani zan khan chhunzawm a ni a, Mizoram Super League champion ngun ber Zarkawt BCA chuan Saron Veng BC an hneh a, Ramhlun SC-in Nursery SC an hneh ve bawk.

BCA nge nge

Champion tura rinkai zinga mi Khatla TBL leh Zemabawk Basketball Club te an chak tawh a, BCA-in an elpuiten hnehna an chan laia chak loh bik an duh lo a, 84-57 in Saron Veng an hneh.

BCA point guard Zonunsanga chu hliam tenau a neih avangin a inlan thei lo a, hliam vanga MSL 10 hnua inlan leh tawh lo Lalrina Renthlei leh Chanmari BC aṭanga an lak Michael Liansanga te an kawl avangin buaina an tawk lo.

D League club te inkhelah Ramhlun SC-in 81-68 in Nursery SC an hneh a, a tir aṭangin team pahnihte point a inthlau lo a, mahse a tawpah Ramhlun SC an dingchang zawk.

Nimin inkhel

Nimin chhun khan hmeichhe inkhel awm bawkin Bungkawn LB Associates chuan 47-29 in Dawrpui Alpha an hneh a, inkhel hnuhnung zawkah Durtlang Mohicans te an inlan loh avangin Maxim SB chu chaka puan an ni.

Tlai lamah D League club inkhel chhunzawmin, game boruak sang takah College Veng BC chuan 83-81 in Electric Veng an hneh a, RSC chu Tuikual South BC nen inhmachhawn leh nghalin, 85-84 in Tuikual South BC an hneh a, Ramhlun club hian hnehna chang turin vanneihna an mamawh.