Practice-ah Verstappen a che ṭha

October 4, Pathianni chhuna Bahrain Grand Prix atana inbuatsaihna chu nimin khan neih a ni a, Red Bull driver Max Verstappen chu pakhatna niin darkar khat leh minute 37-naah a thleng

Dutch driver hi tun hnaiah a che ṭha a, inelna hnung pathum Italian GP, Spanish GP leh Azerbaijan GP-ah podium a lawn pha vek a, mahse hnehna a chang zo lo vek thung.

Kum 28 mi Verstappen hi tun season-a driver chanchin ngah ber a ni a, inelna ṭan hmain F1 dan thar siam chu a duh loh thu uchuak taka a sawi avangin amah pawhin sawisel a hlawh.

Tun season tir lamah a lungawi loh bakah beisei a phâk loh avangin F1 chawlhsan tum anga sawi a awm hman hial. Mahse Verstappen a insiamṭha chho a, podium vawi sarih a lawn leh tawh.

Driver's table-ah Verstappen hian point 163 hmuin paruknaah a awm mek a, hmahruaitu Andrea Kimi Antonelli nen point 139-in an inthlau mek. Tun season-ah pakhatna la ni thei lo mah se practice-ah a chet ṭhat avangin beisei a nei sang ang.

Kum 28 mi Verstappen dawt chiahah hian Azerbaijan-a pakhatna George Russell chu thlengin pahnihna a ni a, Verstappen-a teammate Isack Hadjar chu pathumna niin Ferrari driver Charles Leclerc chu palinaah a thleng bawk.

Driver pathumte hian Verstappen an phâk lohna hi second khat pawh a tling lo a, pangana Kimi Antonelli leh palina Leclerc inthlauhna chu second khat a ni thung. Drivers' table-a pakhatna hauhtu Antonelli a che ṭha tawk lo.

Kumin Bahrain GP hi April thlaa neih tura ruahman ni mah se West Asia indona vangin ṭhulh a ni a, Malaysian GP an neihna hmun Sepang Circuit-ah Pathianni chhun dar 12:30-ah an nei dawn. He inelna atan hian Bahrain lamin senso an tum vek dawn thung.