Darmian-a'n Bologna a zawm

Club nei loa awm mek Matteo Darmian chuan Bologna a zawm a, kum khat châm turin Serie A club hi inremna a neihpui a, International break zawh hnuah chhawr theih a ni nghal ang.

Kum 36 mi Darmian hi season hmasa khan Inter tan rinrawl a ni pha tawh lo a, inelna hrang hrangah match 12 chiah a khel. Season a tawp rualin a contract a tawp ve nghal a, club ṭhenkhat nen sawizawm ni nghalin an zingah AS Roma pawh an tel. Mahse thla thum chhung club nei loin a awm tawh.

Mahse Bologna an lo lang a, an right back Emil Holm chu Nations League-a Romania nen an inkhelh ṭuma a inhliam avangin thla li aṭanga thla ruk tal a chawlh a ngai dawn a, a thlakna turin Darmian an duh.

Manchester United defender hlui hi a kum tam ve deuh tawh mah se tawnhriat a ngah ve tawk tawh a, League-ah Inter tan kum ruk a lo khelh tawh avangin Bologna tan mamawh chhanna a la ni thei ang.

Italian defender hi AC Milan academy chhuak a ni a, mahse Milan-a kum thum a awm chhungin match li chiah a khel a, 2009-a loan-a Padova tan a khelh hnuah a nghetin Palermo a zawm.

Palermo tan match 11 chiah inlan mah se Torino-in an la lut a, player pawimawh niin match 133 a khelhsak hman. Kum 2015 khan khatihlaia Man United coach Louis Van Gaal-a'n a la lut a, khawvelin Darmian a hre ṭan.

Red Devils tan Darmian che chhe lo mah se hliam vangin a buai ngun a, Old Trafford-a kum li a awm chhungin match 60 chauh a khel hman. Kum 2019 khan Italy-ah kir lehin Parma a zawm.

Parma tan a khelh lai 2020 khan Inter-ah loan-in a chhuak a, a khelh ṭhat avangin a nghetin an la zui. San Siro-a a awm chhungin player pawimawh a ni phâk a, match 150 a khelhsak hman.

Darmian hian United tan a khelh laiin FA Cup, League Cup leh Europa League nomawi pakhat ṭheuh a chawipui a, Inter tan Serie A vawi thum a champion bakah Coppa Italia-ah vawi thum bawk a champion pui a, Italy tan match 46 a khel hman bawk.