Swimming-ah India aiawhin Mizo pathum

Mizoram infiamnain bung thar a kai zel - Mizo tuihleuh thiam pathum, Lalrindika, Lalrinpuii Fanai leh Vanlalṭanpuii te chuan Asia huap tuihleuh inelnaah India ai an awh a, Mizo swimmer-te India aiawha an fehchhuahna hmasa ber a ni!

2nd Asian Masters Swimming Championships 2026 chu nimin khan Bengaluru-ah neih ṭan a ni a, October 10, Inrinni thleng inelna hi neih tur niin, Mizo swimmer-te hian October 3, Inrinni khan inelna neihna hmun tur Bengaluru an thleng.

Padukone-Dravid Centre for Sports Excellence, Bengaluru-a neih inelnaah hian kum 25 chin chunglam tuihleuh thiamte inelin, 80+ inelna thlengin a awm - Mizo swimmer palite hi thla hmasa lawka neih, 22nd National Masters Championship 2026-ah an chet ṭhat avangin India aiawh tur hian thlan an ni.

Chanmari tlangval Rd-a hian national masters inelnaah hian 50m & 100m Freestyle-ah inelna hmachhawnin, 100m Freestyle-ah palina niin, second khatin bronze latu a phak lo - India aiawh turin thlan a ni ta tho a, tun inelnaah hian 50m Freestyle-ah India aiawhin a inlan ang.

Chaltlang Venglai nu Vanlalṭanpuii (Lapuii) hian national masters inelnaah khan kum 50-54 category-ah inelna a hmachhawn a, 50m & 200m breaststroke-ah te bronze medal lain, Mizoramin national level-a swimming-a medal a lak hmasak ber a ni - tun inelnaah pawh hian 50m & 200m breaststroke-ah tho inlanin, India tan tui a hleuh dawn!

Chawnpui nula Lalrinpuii hi national masters-ah khan kum 25-29 inkar inelnaah telin, 200m breaststroke-ah Mizoram tan bronze a la - tun inelnaah hian India tan 50m & 200m breaststroke-ah te inelna a hmachhawn dawn a ni.