Pro Fight : Zanin aṭangin Quarterfinal

Mizoram Labour Link LPS Pro Fight 2026 zan 22-na chu zaninah chhunzawm a ni leh dawn a, inhnek paruk a awm ang. Quarterfinal a nih tawh avangin bout tinah inhnek hmuhnawm a beisei ngam.

Vanlalenkawltira'n quarterfinal inhnek a hawng dawn a, Sialhawk boxer Michael Zosangliana nen an inhnek dawn. Flyweight inhnek hnuhnung zawkah seeded zinga mi Nicky Zothanpuia a inlan dawn bawk a, Lunglei Electric veng boxer Freddy Lalpeksanga nen an inhmachhawn ve thung ang.

Bantamweight-ah Dolrich Zothansanga a inlan leh dawn a, champion tura rinkai zinga mi Dolrich-a hi L Joseph Buihringpachha nen an intawng dawn. Lunglei Electric Veng tlangval Dolrich-a hian round of 16-ah C. Lalruatfela a hneh hram a, Joseph-a hneh a tum a nih chuan hma a sawn a ngai tawh ang.

Lightweight inhnek turin nghahlelh a hlawh dawn a, a chhan chu seeded boxer pahnih Lallawmawma leh Lalbiakzuala te an inhmachhawn dawn vang a ni. Welterweight champion lai tlangval Lawmawma thiamzia mipuiin an hre tawh.

A khingpui tur Micky pawh hian kumina che ṭha tak LV Robert Lalengliana a hneh theih avangin, rinkai zawk ni lo mah sem Tuipui tlangval lawma barakhaih thei turin theihna sang tak a nei.

Welterweight-ah champion kawnghren lo kawl tawhtu HC Lalramfela a inlan leh dawn a, Upper Republic tlangval Zohmangaiha nen an inhnek dawn. Middleweight-ah a kawnghren lak let tum C. Lalhruaitluanga leh Vanlalhriata te an inhmachhawk dawn bawk.