Chhungkaw tungding theitu innghahna tlak nih ka duh - Tluangi

Asian Games 2026 gold medalist Lalnuntluangi chuan hockey hmanga chhungkaw tundin leh innghahna tlak nih a tum thu Vanglaini a hrilh. Kolasib nula Lalremsiami Hmarzote ang bawkin Kanghmun South nula Tluangi hi 'Mizo Idol' nih tling a ni.

SAI Training Center (STC) Thenzawl aṭanga inzir chhuak Tluangi hian kum naupang takin hlawhtlinna chang mah se Asian Games gold medalist ni tura a zinkawng hi a awlsam bik lo. Kanghmun South nula chuan, "Beidawn rum rum chang chu a awm ve ṭhin a, mah se hockey khel lo tura rilru siam em chu a awm lo," tiin Vanglaini a hrilh.

Mizoram aiawha a khelh aṭangin India rama hockey lama thuneituten an theihna an hmu a, kum 2024 kumitirah Junior National Camp a zawm a, hemi kum hian Oman-ah Women's Junior Asia Cup-ah India tan khelin a champion pui. Heta a chet ṭhat avang hian FIH Women's Nations Cup 2025-ah India senior team tan a khel ṭan a, a theihna sang tak avangin Asian Games-ah pawh a tel chhunzawm ta zel.

Tluangi chuan, "Kan champion chhan hi Pathian vang liau liau a ni a, team work a ṭha a, player leh supporting staff ten beiseina sang tak kan nei a, Pathianin mal min sawm a ni," tiin Pathian vang a nih thu a sawi.

Kanghmun South nula hian India tan match 13 a khel tawh a, defender a ni chungin goal hnih khung tawhin a goal khung pahnih hi kumin Asian Games-a Uzbekistan an hneh ṭuma a khung a ni.

Lalhriatzuala leh Darrimawii te fanu Tluangi chuan, "Chhungkaw tungding theitu innghahna tlak nih ka duh a, hockey hi ka khel zel dawn," tiin Vanglaini a hrilh a, a rilru put hmang hi Mizo ṭhalaite tana entawn atan a duhawm hle.

Kanghmun South hi in 140 vel lek awmna khua a ni a, mi 645 bawr vel chauh cheng mah se Asian Games gold medalist an neih avangin Mizoramah an khaw hming a thang mawi a, Tluangi vangin India ramah Mizoram hming a mawi bawk.