India vs Uruguay: Zaninah khelh a ni dawn ta
Brazil nena an inkhelh hnuah India chuan Uruguay nen friendly match an khel leh dawn ta a, zanin dar 7:30 hian an hmachhawn dawn - Blue Tigers tan fiahna hautak a inchhawp leh ta a, inkhel hi Sony Sports Network bawkin an pe chhuak ang.
India hian tun international break-ah match thum khelin, an match hmasa berah Panama chu rin loh takin, 1-1 in an chelh a, Brazil lakah 4-0 in tlawm zui mah se, world class team laka an khelh dan enin, fak an hlawh hle.
Blue Tigers squad-ah hian Lalengmawia Ralte (Apuia), Edmund Lalrindika leh Hmingthanmawia Ralte (Valpuia) te chu squad-ah an tel a, Mizo player pathumte hi inlan leh vek tura beisei an ni.
Uruguay inbuatsaihna
September 30, Nilaini khan Uruguay hian India an thleng tawh a, Blue Tigers hmachhawn tur hian an ti mai mai lo tih a chiang hle - training an nei rei tawh a, tawh an khirh dawn.
Brazil khan October 3-a inkhel tur khan, October 1 zanah India an thleng ve chauh a, vawi khat chiah India-ah training an nei hman. Uruguay aiin hahdamna hun an nei tlem tihna a ni.
Hei vang hian Brazil kha team ṭha zawk niin lang mah se, India tan Uruguay hmachhawn hi hautak zawk tura ngaih a ni a, Khalid Jamil leh a naute Uruguay lakah an inbuatsaih ṭhat a pawimawh dawn.
Team ṭha
Uruguay-in an ram legend Diego Forlan hoin indinthar hna an thawk mek a, tun international break-ah Asia lam hawiin an zin - match hmasa berah Japan chu 3-1 in ngam lo mah se, South Korea chu 4-1 in an sawp zui.
India leh South Korea inthlauhna pawh a sang a, Uruguay laka beisei tihsan a harsa hle. South American team hian an player langsar, Liverpool striker hlui Darwin Nunez leh Reds defender Ronald Araujo te pawh an hruai!
Tottenham Hotspur midfielder Rodrigo Bentancur te pawh en liam mai chi a ni lo ang tih a chiang a, hetihrual hian Real Madrid midfielder Federico Valverde erawh Blue Tigers hmachhawn tur zingah a tel lo.
A harsa dawn
Mizo midfielder Apuia chuan, "Brazil nen kan inkhel tawh a, chu vang chuan Uruguay hi an zuamawm sawt tihna erawh a ni lo. Brazil kha chu kan inkhelh hmain zin leh match khelh an ngah a, an chau.
"Uruguay erawh Brazil ai pawhin an lo thleng hmasa a, Brazil ai mah khan hmachhawn an hautak ka ring," a ti a, Forlan-a naute hmachhawn chu Brazil nena an inkhelh aia a harsat zawk a rin thu Vanglaini a hrilh.
Hetihrual hian Forlan pawhin India a en nau duh lo. Mumbai City forward hlui chuan, "India hian player ṭha an nei nual a, tih tur an hria. Player an inman a, hun leh hmun awl pek chuan min hrem thei an ni. Eng team pawh hmachhawn dawn ila, fimkhur zel tur," a ti a, India laka chak saah a indah lo.