Pro Panja khel turin tling

Mizo armwrestler Vanlalduata leh Biaksiamliana te chuan Pro Panja trial hmachhawnin an paltlang a, India rama arm wrestling intihsiakna lar Pro Panja League-ah an inlan thei dawn.

October 2-3 inkar khan Guwahati khawpuiah Pro Panja Trial hi neih niin, Mizoram aiawh player 15-ten inelna hmachhawnin, weight category hrang hrang, 60kg hnuai, 70kg hnuai, 80kg hnuai, 90kg hnuai leh 90kg chunglamah te inelna an hmachhawn a, gold medal pahnih an hlawh chhuak.

Lawngtlai tlangval Vanlalduata chuan 80kg hnuai lamah inelna hmachhawnin gold medal a la a, 90kg hnuai lam inelnaah Lunglei tlangval Biaksiamliana chu a thiam ber niin, gold medal a la bawk - Mizo armwrestler dangten 60kg leh 70kg-ah silver la mah se, Pro Panja League thlen nan a tawk lo.

Hetihlai hian Raymod K. Lalrinpuia chuan Super Match-ah inelna hmachhawn bawkin, Chaltlang Lily Veng tlangval hian Assam player ṭha leh champion of champions ni lai chu 3-0 in an hneh.

Pro Panja League (PPL) hi professional arm wrestling league niin, Mizo tlangval Denic Lalruattluanga pawhin a hming a lo chher tawh hle.