Pro Fight: Lightweight hmuhnawm zan

Mizoram Labour Link LPS Pro Fight 2026 zan 23-na chu zaninah chhunzawm a ni leh dawn a, quarterfinal a nih bakah lightweight-ah kumina boxer ṭha leh hming langsar sate an inlan dawn avangin inhnek hmuhnawm a beisei ngam.

Kumina Pro Fight-ah lightweight hi boxer ṭha an tam berna ti hialin mipuiin an sawi a, a awm lo hran lo. Champion tawh HC Lalramfela bakah final lo lut tawh C. Lalhruaitluanga te an tel nawn a, nikum Mega Boxing-a champion Lalruatmawia a inlan bakah Welterweight champion lai Lallawmawma a insawn bawk.

Zaninah Ruatmawia a inlan dawn a, Chhiahtlang tlangval hian Kanan Veng boxer Lalrohlua Pautu a hmachhawn dawn. A fitness a ṭhat vanga 'Diesel Engine' ti hiala an koh Ruatmawia hian tharum a ngah tel a, mahse kumina inelnaa che ṭha ber zinga mi Rohlua lakah a fimkhur a ngai tawh thung ang.

Rohlua hi Pro Fight-a a vawi khat telna chauh ni mah se ring chhungah a tlangnel nghal a, a inhnek tawh dan enin Ruatmawia lakah pawh a zam a rinawm loh. Chutihrualin Ruatmawia hi nikum Mega Boxing-a Lawmawma hneh thei a nih avangin zuam chi a ni bik lo ang.

Lightweight inhnek tur pakhat zawkah Abednago VL Dinpuia leh C. Lalfakawm te an inhmachhawn leh dawn a, boxer pahnih hi round of 16-a an khel a hmuhnawm avangin mipui ngaihven hlawh lai an ni.

Abednago hian boxer rothap Lalrinhlua chu unanimous decision-in a hneh thei a, Phuaibuang tlangval Fakawma hian seeded ni phâk Lalramdinsanga a knockout bawk.

Boxer pahnihte hi HB Boxing, Edenthara training ve ve an nih avangin an inhre chiang dawn a, an chakna leh chak lohna lai an inhriatsak ve ve dawn avangin inhnek hmuhnawm an chhawpchhuah a rinawm.

Hei bakah hian middleweight-ah Franky H Vanlalruatpuia a inlan dawn bawk a, Lunglei Salem Veng tlangval Franky hian quarterfinal lut turin champion tura rinkai zinga mi Boyka Lalhriatsanga a hneh thei a, a chungnung zawkah a ṭang tluan zak thei.

Chutihrualin Bawngkawn West rawlthar Samuel Zadeng a duai bik lo a, a ban seina hman ṭangkai leh a tum dawn avangin Franky pawh a fimkhur loh chuan chak lo thei dinhmunah a ding.