Verstappen hun a inherchhuak ve ta

Formula 1-ah tun season ṭan hmaa chanchin ngah tak Max Verstappen tan lawmna tur a awm ve ta a, Red Bull driver hi Pathianni zana Bahrain Grand Prix-ah pakhatna niin tun season-a hnehna a chan hmasak ber a ni.

Pathianni zana intlansiakah hi tun season-a vawi 16 an tlanna a ni a, hemi hma hian Verstappen hi podium vawi sarih lawn tawhin hnehna a la chang lo. Mahse, Zirtawpnia practice an neihah a chet ṭhat avangin fans-in beisei an nei sang. Dutch driver-in an beisei a tithlawn lo chiang hle.

Sepang Circuit-a intlansiakah a tir aṭangin Verstappen a che ṭha tluan a, Andrea Kimi Antonelli nen an inlehpelh zak zak hnuah Verstappen a dingchang ta zawk a, a career-a vawi 72 a chakna chiah a ni.

Kum 28 mi Verstappen chuan, "A nuam ka ti takzet a, tun hnaia kan thil paltlangte ngaihtuahin a hlu ka ti lehzual. Kan team-a thawktute zawng zawng zara hetiang dinhmuna ding thei hi ka ni, chuvangin ka lawm takzet," a ti.

Tun season ṭan dawn khan FIA-in dan thar an siam leh car an thlak danglam chungchangah Verstappen a lawm lo a, a lungawi lohna hi a au chhuahpui nasa hle. Season ṭan hnuah beisei anga a chet ṭhat loh bawk avangin F1 chawlhsan a tum hman hial.

Mahse, Verstappen-a'n muangchangin hma a sawn zel a, Mercedes nen sawizawm ni hman mah se August thla khan 2030 thleng Red Bull-a châm turin contract thar a ziak. Hemi hnu hian Verstappen-a'n hma a sawn lehzual a, beidawng loa a beihna rah chu Bahrain GP-ah a hmu.

Verstappen-a dawt chiahah Antonelli a thleng ve nghal a, Italian driver hian second 2.3 chauhin Dutch driver a tluk lo. Ferrari driver Lewis Hamilton chu pathumnaah thlengin Verstappen nen second liin an inthlau thung.

Ferrari driver pakhat zawk Charles Leclerc chu palina a ni a, panganaah Isack Hadjar thlengin McLaren driver Oscar Piastri chu parukna a ni bawk. Piastri-a teammate Lando Norris erawh pakuana a ni thei hram a, champion lai Norris a tlan ṭha tawk lo.

Hetihlai hian a tawp thleng zo lo driver pathum an awm a, an zingah George Russell a tel. Azerbaijan GP-a pakhatna Russell hi lap 50-naah a engine lamah buaina a awm avangin a ding.

Lap nga chiah tlan tur awm tawh mah se a chhunzawm thei lo a, a din lai hian pathumna niin Verstappen leh a teammate Antonelli te chauh a hmaah an awm avangin Mercedes driver hian a ui vawng vawng ang.

Kumin Bahrain GP hi April thlaa neih tura ruahman ni mah se West Asia indona avangin ṭhulh a ni a, Malaysian GP an neihna hmun Sepang Circuit-ah neih niin Bahrain lamin senso an tum vek thung. October 11, Pathianni zan hian Singapore GP a awm leh nghal dawn a, driver ten chawlh an nei rei dawn lo hle.