Hmun chan hnem tum Kounde

Barcelona defender Jules Kounde chuan tun season kal mekah hmun chang tam lo mah se, club football an ṭan leh hunah rinrawl ni leh tura theihtawp a chhuah tur thu a sawi.

Kum 27 mi Kounde hi tun season-ah Eric Garcia-a'n a luahlan a, La Liga match riat an khelh tawhah vawi li inlan ve tawh mah se vawi khat chiah bul a la ṭan a, Hansi Flick-a hnuaia rinrawl a ni pha tawh lo.

French defender Kounde chuan, "Kan coach thutlukna a ni a, kei chuan inhliam ka nei lo a, ka taksa a fit ṭha. Hmun ka chang tlem a nih chuan season hmasa lamah min beisei anga khelh ṭhat loh ka nei tihna a ni mai. Coach thutlukna ka zahsak a, hmun chang tam leh turin ka thawhrim lehzual a ngai a ni," a ti a, a êng zawngin a thlir thiam hle.

Sevilla defender hlui hi Nations League khelh mekah Zinedine Zidane-a'n France tana khel turin a ko a, Turkey nen an inkhelh ṭumin bul ṭan mah se a inlan leh tawh lo. Nizan khan Les Bleus hian Belgium an hmachhawn a, an result kan hre hman lo.

Tun kar tawp aṭangin club football a inṭan leh dawn a, Catalan club pawhin October 10, Inrinni zan dar 10:00-ah Getafe an mikhual nghal dawn. Kounde erawhin bul a ṭan nghal a rinawm loh thung.