Khatla TBL hmaa ding tur Saron

Mizoram Basketball Association buatsaih Favang tournament chu zaninah khelh chhunzawm a ni leh dawn a, Khatla TBL dinhmun tihchianin a awm tawh dawn. TBL hian dar 8:30-ah Saron Basketball Club an hmachhawn ang.

Mizoram Super League champion lai TBL-in an match hmasa berah Ramthar Vanguard hneh nghal mah se, October 3, Inrinni zan khan an elpui ber Zarkawt BCA an hneh lo.

MSL club Pool A-ah match hnih ṭheuh khelh ni tawhin, BCA chiah hi vawi hnih chak awm chhun an ni a, TBL hi pahnihnaah awm mah se Saron an hneh lo a nih chuan semifinal lut lo thei an ni.

TBL-in Laltlanhlua nei mah se amah thlawp tur palian dang an tlachham tih a hmuh theih a, Saron-in Laldinsanga, K. Liandinga leh Ramdinfela te an kawl avangin an fimkhur a ngai ang.

Hei bakah hian Saron hian MSL 10-a 'Rookie of the Season' Lalmalsawma an la kawl cheu a, season hmasa MSL match hmasa berah TBL an lo hneh tawh avangin an hlau bik lo ang.

Chutihtualin TBL tan Vanlalṭhazuala leh Emanuel VL Awmpuia an la awm a, eng team tan pawh hmachhawn châkawm loh tur khawpa theihna nei sang an nih avangin chak lo tura dah an har.

Dar 6:30-ah D League an khel dawn bawk a, Chawnpui BC leh Ramhlun SC te an inhmachhawn dawn. Ramhlun hi an pool-ah chak vek chunga semifinal lut turin Chawnpui hneh chiah an mamawh tawh a, Chawnpui erawh semifinal lut turin chak an mamawh bakah midang result-ah an innghat tel thung.