Harris a inhliam nghal

San Antonio Spurs forward thar Tobias Harris chu training an neihnaah a chawn vei lam a ti na a, a chawlh chen tur hi sawi lawk theih ni lo mah se preseason-ah a inkhel ve thei dawn lo.

Kum 34 mi Harris hliam hi doctor ten an endik tawh a, preseason bakah October 21, Pathianni zinga Oklahoma City Thunder nen regular season-a an match hmasa ber an khelh turah inlan lo thei dinhmunah a ding niin khawthlang chanchinbute chuan an ziak.

Spurs coach Mitch Johnson chuan, "Harris-a inhliam hi pawi kan ti a, season bul min ṭanpui theih kan la beisei reng a, mahse a hriselna kan ngaihpawimawh ber avangin ka nawr lui dawn lo. A hliam hian a tha a khawih tel a, ṭha taka enkawl dam a nih hi kan tan a pawimawh ber," a ti.

American power forward Harris hian kumin July thla khan, Detroit Pistons-a a contract a tawp hnuah Spurs hi a thlawnin a zawm a, kum hnih khel tura contract ziakin dollar maktaduai 31 hlawh turin an inrem.

Harris hian Spurs a zawm tirhin, "Ka tawnhriat ngahna leh ka thiamnate hi he team tan hian ṭangkai takin hman chhuah ka tum dawn a, player naupang zawkte entawn tlak ni thei turin ka khel ang," tiin a sawi. Mahse match khat pawh a khelh hmain a inhliam leh nghal a, Spurs ṭantuten Harris-a inkhel en turin an nghah rih a la ngai.

Western Conference club hian kuminah player an la lut nasa a, mahse a tam zawk hi Harris bakah player dang pariat an la lut. Mahse, a tam zawk hi 'two way contract' a ni a, NBA-ah an inlan nghal a rinawm loh.

Draft-a an thlan Jayden Quaintance leh an lak thar Tarris Reed Jr. leh Jordan McLaughlin te erawh an chhawr nghal a rinawm a, an forward neih sa Julian Champagnie an thlun ngheh theih bawk avangin Harris awm lo mah se an buai phah lo ang.